महाराष्ट्र सरकारले दियो सुटिङको अनुमती

भारतको महाराष्ट्र सरकारले विभिन्न स्थानमा छायांकनका लागि अनुमती दिएको छ । तर, यसका लागि छायांकन यूनिटले विभिन्न शर्तहरुको पालना गर्नुपर्नेछ ।

भारतमा लामो समयदेखिको लक डाउनका कारण चलचित्र, सिरियल, रियालिटी शो लगायतको छायांकन रोकिएको थियो । अब, विस्तारै छायांकन सुरु गर्ने तयारीमा निर्माताहरु लागेका छन् ।

राज्यको संकृती मन्त्रालयले जारी गरेको शर्त अनुसार नै निर्माताले काम गर्नुपर्नेछ । नियम पालना नगरेको खण्डमा छायांकन रोक्न सकिने मन्त्रालयले बताएको छ ।

नयाँ नियम अनुसार, छायांकन सेटमा ३३ जना मात्र सदस्यहरु रहनुपर्नेछ । निर्माताहरुलाई महाराष्ट्र फिल्म, थिएटर, कल्चरल डेभलपमेन्ट कर्पोरेशन, दादा साहेब फाल्के चित्रनगरीको साथै मुम्बई बाहिर छायांकनका लागि जिल्ला कलेक्टरको अफिसमा आवेदन दिनुपर्नेछ ।

महाराष्ट्र सरकारले १६ पेज लामो गाइडलाइन प्रस्तुत गरेको छ । जसमा, छायांकनको समयमा मास्क लगाउनुपर्ने, मेकअप म्यानले पीपीई लगाएर मात्रै मेकअप गर्न पाउने, छायांकन सेटमा सामाजिक दुरी कायम गर्नुपर्ने, छायांकनको समयमा भीड जम्मा गर्न नपाइने, छायांकन सेटमा डाक्टर र नर्स अनिवार्य हुनुपर्ने, गर्भवती कलाकारलाई छायांकनमा ल्याउन नपाइने, ६५ बर्ष भन्दा माथिका कलाकार वा अन्य क्रु सदस्यलाई छायांकनमा काम गराउने नपाइने लगायतका नियम छन् ।

source https://www.onlinekhabar.com/2020/06/869334