भवन उद्घाटन गर्न राष्ट्रपति बैतडी जाँदै, नगरपालिकाभर बिदा

१४ फागुन, काठमाडौं । राष्ट्रपति विद्यादेवी भण्डारी भवन उद्घाटनका लागि बिहीबार बैतडी जाने भएकी छन् ।  राष्ट्रपति जाने भएपछि बैतडीस्थित पाटन नगरपालिकाले सार्वजनिक बिदा दिएको छ ।

बैतडीको पाटन नगरपालिका–६ मा निर्माण भएको प्राविधिक शिक्षा तथा व्यावसायिक तालिम परिषद् (सीटीईभीटी) भवन उद्घाटनका लागि राष्ट्रपति भण्डारी बिहीबार बैतडी जान लागेकी हुन् । त्यस्तै, नागरिक अभिनन्दनलगायतका कार्यक्रम पनि नगरपालिकाले राखेको छ ।

राष्ट्रपति भण्डारी सुदूरपश्चिम प्रदेशको भ्रमणका लागि कैलाली जाँदै छिन् । कैलालीपछि उनी त्यतैबाट डोटी जान लागेकी हुन् ।

पाटन नगरपालिकाका प्रमुख केशबबहादर चन्द राष्ट्रपति पहिलोपटक नगरपालिकामा आउन लागेकाले स्वागतका लागि १ दिन सार्वजनिक बिदा दिएको जानकारी दिए ।

‘राष्ट्रपतिज्यू पहिलोपटक हाम्रो नगरपालिकामा आउँदै हुनुहुन्छ । उहाँको स्वागतका लागि १ दिन नगरपालिकाभर सार्वजनिक बिदा दिने निर्णय गरेका हौं,’ नगर प्रमुख चन्दले अनलाइनखबरसँग भने ।

source https://www.onlinekhabar.com/2020/02/839676