‘परदेशी २’मा प्रकाश सपुत हिरो, भन्छन्–‘राम्रो कथाले तान्यो’

‘बोल माया, गलबन्दी’ जस्ता सफल गीतका गायक प्रकाश सपुतलाई अब भने ठुलो पर्दामा दर्शकले हेर्न पाउने भएका छन् । वि.सं २०७२ सालको सुपरहिट चलचित्र ‘परदेशी’को दोस्रो सिरिज ‘परदेशी २’बाट उनले ठुलो पर्दामा डेब्यु गर्न लागेका हुन् ।

नारायण रायमाझीले निर्देशन गर्ने यो चलचित्रको लागि प्रकाशसँग कागजी सम्झौता भइसकेको छ । प्रकाश सपुत आफ्नो रुचिको विषय भएकाले चलचित्रमा काम गर्न लागेको बताउँछन् । अनलाइनखबरसँगको कुराकानीमा उनले भने–‘चलचित्रमा काम गर्ने मेरो सानै उमेर देखिको रहर हो । तर, रहर भन्दैमा आफ्नो अहिले भइरहेको करिअरलाई असर पर्ने गरि काम भने गर्ने छैन ।’

‘दोहोरी ब्याटल’ हिट भएसँगै प्रकाशलाई धेरै चलचिबाट अफर आएका थिए । ‘बोल माया र गलबन्दी’को सफलताले उनलाई चलचित्र मेकिङको पनि अफर नआएको होइन । तर, आफूलाई मन पर्ने चलचित्र नपाएपछि उनी पछि हटेका थिए । प्रकाश भन्छन्–‘यो चलचित्रमा भने टिम पनि राम्रो हुनुहुन्छ । चलचित्रको विषयबस्तु पनि राम्रो छ । त्यसैले काम गर्न तयार भएको हुँ ।’

‘परदेशी २’ ले वैदेशिक रोजगारमा लागेका युवाहरुको कथा भन्नेछ । चलचित्रको अहिले कथामा काम भैरहेको छ । चलचित्रको लागि नायिकाको खोजी भने भैरहेको छ । प्रकाशले अगाडि भने–‘मेरो ठूलो पर्दामा पनि काम गर्ने रहर थियो । तर, मेरो पेशा भने गायन नै हो ।’

चलचित्रलाई आउँदो बर्षको दशैंमा रिलिज गर्ने योजना निर्माणपक्षले लिएको छ ।

source https://www.onlinekhabar.com/2019/12/824307