चैत्र २१ मा रिलिज हुँदा ‘लक्का जवान’लाई के फाइदा ?

केही बर्षदेखि नेपाली चलचित्र क्षेत्रमा कमेडी कथा हाबी छन् । अझ, हाँस्य कलाकारहरुको टिमले बनाएको चलचित्रले व्यापारिक रुपमा पनि सफलता पाइरहेका छन् । यसैले, पनि हाँस्य कलाकारहरुले बनाएका चलचित्र भन्ने वित्तिकै सफल हुन्छन् भनेर अड्कल लगाइन्छ ।

छायांकन प्रारम्भदेखि नै चैत्र ७ गतेलाई प्रदर्शन मिति तोकिएको चलचित्र ‘लक्का जवान’ अब चैत्र २१ मा रिलिज हुँदैछ । निर्माण टिमले दुई सातापछि चलचित्र धकेल्दा के फाइदा होला त ? जबकी, मह जोडीले अभिनय गरेको चलचित्र शत्रु गते चैत्रको दोश्रो सातामा रिलिज हुँदा नै सुपरहिट भएको थियो ।

शिवहरि पौड्यालको निर्देेशनमा तयार भएको यो चलचित्रको टिमले चैत्रको दोश्रो साता पर्ने एएइइ परिक्षालाई ध्यानमा राखेर चलचित्रको रिलिज मिति पछि सारेको हो । चलचित्रमा किरण केसी, शिवहरि पौड्याल, दिलिप रायमाझी, वर्षा सिवाकोटी, प्रियंका कार्की मुख्य भूमिकामा छन् ।

यो चलचित्र चैत्र २१ मा सोलो रिलिज हुँदैछ । त्यसको एक सातापछि नयाँ बर्षको बिदाको फाइदा पनि यो चलचित्रले उठाउने आशा निर्माणपक्षको छ । हुनत, चैत्र २८ गते दुइवटा नेपाली चलचित्र रिलिज हुँदैछन् । तर, केही शोजहरु दोश्रो सातामा पनि पाउने र यसको फाइदा नयाँ बर्षमा हुने अपेक्षा निर्माताको छ ।

यो बर्ष मह जोडीको ‘दाल भात तरकारी’, दीपकराज गिरी र उनको टिमको ‘छ माया छपक्कै’ रिलिज भैसकेका छन् । अब, हाँस्य कलाकारको टिमले बनाएको ‘सेन्टी भाइरस र लक्का जवान’ रिलिजको प्रतिक्षा दर्शकमा छ ।

source https://www.onlinekhabar.com/2020/01/824907