पूरा भएन डिसेम्बरमा दुई करोड मानिसलाई कोरोना खोप दिने अमेरिकाको लक्ष्य

१७ पुस, काठमाडौं । अमेरिकामा डिसेम्बर महिना सकिँदासम्म २८ लाख मानिसहरुले कोरोना भाइरस (कोभिड–१९) विरुद्धको खोप लगाएका छन् । अमेरिकाले डिसेम्बर महिनामा दुई करोड मानिलाई कोरोना खोप लगाउने लक्ष्य राखेको थियो । अमेरिकाको अन्य क्षेत्रका साथै नर्सिङ होममा पनि कोरोना खोप कार्यक्रम निकै सुस्त गतिमा अघि बढिरहेको पाइएको छ । जबकी फ्रन्टलाइनमा काम गर्ने मानिसमा कोरोनाको जोखिम बढी हुन्छ ।

अमेरिकाको लङ टर्म केयरमा एक लाख ७० हजारलाई कोरोना खोप दिइएको छ । अमेरिकाको सेन्टर फर डिजिज कन्ट्रोल एण्ड प्रिभेन्सन (सीडीसी)ले दिएको जानकारी अनुसार अहिलेसम्म २२ लाख खोप त्यहाँका मानिसहरुका लागि वितरण गरिसकिएको छ । अहिलेसम्म अमेरिकामा फाइजरको एक करोड ४० लाख डोज कोरोना खोप वितरण गरिएको छ । डिसेम्बर महिनामा फाइजरको २ करोड डोज खोप वितरण गर्ने लक्ष्य राखिएको थियो ।

अमेरिकी अधिकारीहरुले डिसेम्बर महिनाको अन्तिमसम्ममा चार करोड डोज कोरोना खोप उपलब्ध हुने बताएका थिए । एकजना मानिसलाई दुई डोज दिँदा यो खोपले दुई करोड मानिसलाई पुग्छ । स्थानीय अधिकारीहरुका अनुसार संघीय सरकारसँग कोरोना खोप वितरणको लागि पर्याप्त रकम नभएको कारण पनि अमेरिकामा कोरोना खोप कार्यक्रममा ढिलाइ भएको हो ।

यसअघि राष्ट्रपतिमा निर्वाचित भएका जो बाइडनले पनि अमेरिकामा खोप कार्यक्रम निकै सुस्त गतिमा चलिरहेको भन्दै चिन्ता व्यक्त गरेका थिए ।

source https://www.onlinekhabar.com/2021/01/920473