हिमपहिरोमा पुरिएको साढे ३ महिनापछि कोरियाली नागरिकको शव भेटियो

१६ वैशाख, काठमाडौं । गत वर्ष माघमा कास्कीको अन्नपूर्ण गाउँपालिका १ हिङ्कु केभमामा हिमपहिरोमा बेपत्ता भएका एक पर्यटकको शव भेटिएको छ ।

नेपाली सेनाको टोलीले हिमपहिरोमा बेपत्ता भएका एक जना कोरियाली नागरिकको शव सोमबार भेटेको हो । शवलाई मंगलबार पोखरा स्वास्थ्य विज्ञान प्रतिष्ठानमा ल्याएको नेपाली सेनाले जनाएको छ ।

२०७६ माघ २ गते अन्नपूर्ण गाउँपालिका १ हिङ्कु केभ इलाकामा गएको हिमपहिरोमा परी ३ जना नेपाली गाइड र चार जना कोरियाली पर्यटक बेपत्ता भएका थिए । तीमध्ये दुई जना नेपाली गाइड र दुई जना कोरियाली पर्यटकको यसअघि नै शव भेटिएको थियो ।

अझै एक जना नेपाली र एक जना कोरियाली नागरिक हराइरहेकाले हिउँभित्र पुरिएको सम्भावित स्थानमा खोजी भइरहेको सेनाको जनसम्पर्क तथा सूचना निर्देशनालयले जनाएको छ ।

source https://www.onlinekhabar.com/2020/04/859021