अक्षय स्टारर ‘सूर्यवंशी’मा ज्याकी श्राफको इन्ट्री

काठमाडौं । अक्षय कुमार स्टारर चलचित्र ‘सूर्यवंशी’ छायांकनको अन्तिम चरणमा छ । पुलिस अफिसरको कथामा बनेको यस चलचित्रलाई रोहित सेट्ठीले निर्देशन गरिरेहका छन् । चलचित्र एक्सनप्रधान बन्नेछ ।

चलचित्रको मुख्य नायिकाको रुपमा कटि्रना कैफ देखिँदैछिन् । साथै यस चलचित्र ‘सिंघम’ स्टार अजय देवगण र ‘सिंम्बा’ स्टार रणवीर सिंहलाई पनि देख्न सकिनेछ । उनीहरुलाई चलचित्रको क्लाइमेक्समा देखाइएको निर्देशक सेट्ठीले बताएका छन् ।

यस्तैमा चलचित्रमा भेट्रान अभिनेता ज्याकी श्राफको प्रवेश भएको छ । २ सयभन्दा बढी चलचित्रमा काम गरिसकेका ज्याकीलाई यस चलचित्रमा अतिथी कलाकारको रुपमा देख्न पाइने छ । निर्माण पक्षले एक तस्वीर सार्वजनिक गर्दै हाल ज्याकीको पार्टको छायांकन चलिरहेको जानकारी दिएको छ ।

‘सूर्यवंशी’ यस वर्षको प्रतिक्षित चलचित्र हो । ‘सिंघम’ र ‘सिंम्बा’ जस्ता सफल चलचित्रको सिरिज चलचित्र भएका कारण पनि यस चलचित्रलाई प्रतिक्षित चलचित्रको रुपमा हेरिएको छ । त्योमाथि मसलेदार चलचित्र निर्माणमा खप्पिस निर्देशक रोहितको चलचित्र भएका कारण पनि यस चलचित्रलाई दर्शकले कुरिरहेका छन् ।

यस चलचित्रले मार्चको २७ तारिखलाई आफ्नो रिलिज मिति तय गरेको छ ।

source https://www.onlinekhabar.com/2020/02/832896