लक्ष्मी बैंकले ६ महिनामा कमायो ९० करोड

१४ माघ, काठमाडौं । लक्ष्मी बैंकले ९० करोड ३० लाख रुपैयाँ खुद मूनाफा आर्जन गरेको छ । चालु आर्थिक वर्षको ६ महिना अर्थात पुस मसान्तसम्म बैंकले उक्त नाफा कमाएको हो ।

अघिल्लो वर्षको तुलनामा बैंकको नाफा करिब २५ प्रतिशतले सुधार भएको छ । गत वर्षको सोहि अवधिमा बैंकले ७३ करोड ३७ लाख रुपैयाँ खुद नाफा कमाएको थियो ।

९ अर्ब ८१ करोड चुक्ता पूँजी रहेको बैंकको खुद नाफा बढेसँगै प्रतिशेयर आम्दानी पनि बढेको देखिएको छ । बैंकको प्रतिशेयर आम्दानी ८० पैसा बढेर १८ रुपैयाँ ४१ पैसा कायम भएको छ ।

बैंकको निष्क्रिय कर्जा १.११ प्रतिशतबाट घटेर ०.८८ प्रतिशतमा सीमित भएको छ । पुस मसान्तसम्ममा बैंकको कष्ट अफ फण्ड ७.२१ प्रतिशत, आधार दर १०.०९ प्रतिशत र स्प्रेड दर ४.२३ प्रतिशत रहेको छ ।

बैंकको प्रतिशेयर नेटवर्थ १३३ रुपैयाँ ९० पैसा रहेको छ भने मूल्य आम्दानी अनुपात ११.१९ गुणा रहेको वित्तीय विवरणमा उल्लेख छ । बैंकको वितरण योग्य नाफा भने ५९ करोड १८ लाख रुपैयाँ रहेको छ ।

source https://www.onlinekhabar.com/2020/01/831812