परिपक्क बन्दै गुल्शन झा

२८ असार, काठमाडौं । क्रिकेटर गुल्शन झा सुरुमा राष्ट्रिय टिममा प्रवेश गर्दा फास्ट बलर थिए । जिम्बाव्वेमा सम्पन्न आईसीसी क्रिकेट विश्वकप छनोटमा भने अलराउण्ड प्रदर्शन गरेर उनले आफ्नो बदलिएको परिचय देखाउने कोसिस गरे ।

वायाँहाते ब्याटर गुल्शन विश्वकप छनोटमा एक अर्धशतकसहित १३९ रन बनाएका थिए । उनले ६ खेल खेल्दा ५ खेलमा ब्याटिङ गरे । यस्तै उनले ८ विकेट लिए । ५ खेलमा समान एक विकेट लिएका उनले एक खेलमा ३ विकेट लिएका थिए ।

नेपालका लागि सर्वाधिक रन बनाउनेमा कुशल भुर्तेल, दीपेन्द्र सिंह ऐरी र कप्तान रोहित पौडेलभन्दा पछि चौथो स्थानमा रहेका उनी सर्वाधिक विकेट लिनेमा करण केसी -१२) भन्दा पछि थिए ।

पहिलो पटक विश्वकप छनोट खेलेका १७ वर्षीय गुल्शनले जिम्बाव्वेमा टेष्ट राष्ट्रहरुसँग खेल्दा धेरै अनुभव लिन पाएको र धेरै कुरा सिक्ने अवसर पाएको बताए । ‘विश्वकप छनोट एकदमै राम्रो अनुभव भयो । ठूला देशहरु वेष्ट इन्डिज, जिम्बाव्वे, आयरल्याण्डसँग खेल्न पायौं,’ गुल्शनले अनलाइनखबरसँग भने, ‘धेरै कुराहरु थाहा पायो र धेरै कुराहरु सिक्न पायौं । आफ्नो कमजोरी पनि थाहा भयो कहाँ काम गर्नुपर्छ भनेर ।’

जिम्बाव्वेमा अलराउण्डर प्रदर्शन गरे पनि गुल्शन यतिमै सन्तुष्ट छैनन् । उनले यसलाई सामान्य प्रदर्शन नै माने । ‘नर्मल भयो । यसमा अझै सुधार हुन सक्थ्यो । अझै योगदान गर्न सकिन्थ्यो । पछि सरहरुसँग पनि कुरा भयो कि कहाँ काम गरेपछि अझै राम्रो गर्न सकिन्छ भनेर ।’

साथै उनले आफूमा अझै सुधार गर्नुपर्ने कुराहरु रहेको पनि बताए । ‘मेरो सुधार गर्नुपर्ने कुराहरु धेरै छन् । मैले लाइन र लेन्थ सुधार गर्नुपर्छ । स्पीड पनि अझ सुधार गर्नुपर्छ,’ ६ फिट उचाइका गुल्शनले भने, ‘बलिङमा विस्तारै सुधार भइरहेको छ । सिक्दै गइरहेको छु र राम्रो हुँदै गइराको छ ।’ उनले थपे, ‘यो लेभलमा जति धेरै म्याच खेल्यो उति नै धेरै सुधार हुँदै जान्छ । खेलिराख्न पायो भने अझ राम्रो हुन्छ ।’

सोमपाल कामी पहिलो खेलमै घाइते भएपछि गुल्शनको जिम्मेवारी पनि बढेको थियो । सोमपाल नहुँदा उनको कमी महसुस भएको गुल्शनले बताए । ‘सोमपाल दाइ राम्रो बलरका साथै अलराउण्डर पनि हुनुहुन्थ्यो । राम्रो ब्याटिङ पनि गर्नुहुन्थ्यो । दाइको कमी भयो,’ गुल्शनले भने, ‘सिक्दै जानुपर्छ । कुनै बेला एडजस्ट गर्नुपर्छ आफ्नो हातमा थिएन त्यो कुरा ।’

परिपक्क बन्दै

२०२१ सेप्टेम्बरमा अमेरिकाविरुद्ध लिग टुमा खेल्दै ओडिआईमा डेब्यु गरेका गुल्शनले यो दुई वर्षमा अझ परिपक्क बन्नै गएका छन् ।

गुल्शनले दुई वर्ष पनि नबित्दै चार फरक विदेशी प्रशिक्षकको अन्डरमा खेलिसकेका छन् । तर यसमा पनि उनलाई राष्ट्रिय टिममा ब्रेक दिने डेभ वाटमोर र परिपक्क बनाउन सहयोग गर्ने मोन्टी देसाईको भूमिका महत्वपूर्ण छ ।

उनले आफूलाई यसअघि लिग टु र एसीसी प्रिमियर कपमा पनि प्रमाणित गरिसकेका छन् । आवश्यक परेका बेला ब्याटबाटै योगदान दिएर नेपाललाई जिताएका समेत छन् । चाहे त्यो लिग टुको अन्तिम खेलमा युएई विरुद्धको अर्धशतक होस् या पि्रमियर कपको फाइनलमा पनि युएई विरुद्ध नै तेस्रो नम्बरमा ब्याटिङ गर्दै अर्धशतक बनाएर जिताउँदा होस् ।

पछिल्लो पटक जिम्बाव्वेमा आयरल्याण्डविरुद्ध पनि उनले आफूलाई प्रमाणित गरे । यस पटक पनि उनले अन्तिम खेलमै अर्धतशक प्रहार गरे ।

गुल्शन झा । तस्वीर : अनलाइनखबर फाइल ।

आयरल्याण्ड विरुद्ध नेपालले २६८ रन बनाउँदा गुल्शनले नवौँ नम्बरमा ब्याटिङ गर्दै अविजित ५७ रन योगदान गरे । त्यस खेलमा नेपालको लागि व्यक्तिगत धेरै रन बनाउने उनै थिए । साथै नवौँ नम्बरमा खेल्दै नेपालका लागि धेरै रन बनाउने कीर्तिमान पनि उनले बनाए ।

नेपाल १६९-७ को अवस्थामा हुँदा गुल्शन क्रिजमा गएका थिए । त्यसपछि उनले सन्दीप लामिछानेसँग मिलेर आठौं विकेटका लागि ८० रनको साझेदारी गरे ।

त्यस खेलमा के योजना थियो त ? गुल्शन भन्छन्, ‘हाम्रो विकेट गइरहेको थियो, रन बनिरहेको थिएन । म ब्याटिङमा जाँदा सरले एउटा टार्गेट दिनुभएको थियो- ५० ओभर खेल र २२० सम्म हेर भनेर । म त्यही सोचेर खेलिरहें । त्यसलाई फलो गरें । त्यसपछि आफैं रन बन्यो ।’

मोन्टी देसाईको आगमनपछि गुल्शनले राष्ट्रिय टिममा राम्रो अवसर पाएका छन् । मोन्टीको आगमनपछि नेपाली टिमको माहोल नै परिवर्तन भएको छ । गुल्शनमा पनि त्यो परिवर्तन भएको छ । ‘सर आउनुभएपछि ममा मात्र नभई टिमकै माहोल चेन्ज भाछ,’ उनी भन्छन्, ‘पहिलेको भन्दा अहिले धेरै कुरामा सुधार भइरहेको छ । मानसिक रुपमा पनि धेरै परिवर्तन भएको छ । स्किल पनि सुधार भएको छ ।’

टेष्ट राष्ट्रसँग खेल्दाको अनुभव

यस पटक जिम्बाव्वेमा नेपालले तीन राष्ट्रसँग ओडिआई म्याच खेल्ने अवसर पायो । जसले गर्दा अहिले नेपाली टिममा धेरै सकारात्मक परिवर्तन आएको छ । ठूला टिमसँग खेल्दाको अनुभव बटुलेको छ ।

विशेषगरी दुई पटकको ओडीआई र दुई पटकको टी-२० विश्वकप विजेता वेष्ट इन्डिजसँग खेल्न पाउनु नेपालका लागि राम्रो अनुभव रहृयो ।

‘वेष्ट इन्डिजसँग खेल्दा एकदमै उत्साहित थियौं । दुई पटक च्याम्पियन टिमसँग खेल्दा फरक अनुभव पायौं । खेलको नतिजा जस्तो भएपनि सिक्ने अवसर पायौं,’ गुल्शन भन्छन्, ‘ठूला टिमसँग खेलेपछि हामी कहाँ कमजोर छौं । के-के काम गर्ने भन्ने थाहा पायौं ।’

जिम्बाव्वेमा सिकेको कुरा अब श्रीलंकामा इमर्जिङ टिम्स कपमा प्रयोग गर्ने गुल्शनले बताए । ‘एसिया कपअघि श्रीलंका भ्रमण हाम्रो लागि एकदमै राम्रो अवसर हो । टेष्ट राष्ट्रको ए टिम पनि धेरै राम्रो नै हुन्छ,’ उनले भने, ‘आफ्नो क्षमता देखाउनका लागि यो राम्रो अवसर हुनेछ ।’

source https://www.onlinekhabar.com/2023/07/1335640