ए डिभिजनमा आज ४ खेल, थ्रीस्टारलाई हराएर चर्च ब्वाइज आझै च्याम्पियन

२३ जेठ, काठमाडौं । शहीद स्मारक ए डिभिजन लिग २०७९-८० अन्तर्गत आज देखि २५औं चरणका खेलहरु सुरु हुँदैछ । आज चार खेल हुनेछन् ।

जसमा दशरथ रंगशालमा दुई तथा एन्फा कम्प्लेक्स र च्यासल रंगशालमा एक एक खेल हुनेछन् ।

दिउँसो तीन बजे दशरथ रंगशलमा शीर्ष स्थानको चर्च ब्वाइजले थ्री स्टार क्लबसँग खेल्नेछ ।

पहिलो पटक ए डिभिजन लिग खेलिरहेको चर्च ब्वाइज उपाधि नजिक छ र थ्री स्टारलाई आज पराजित गरेर एक खेल अगावै च्याम्पियन बन्नेछ ।

चर्च ब्वाइज ठूलो कीर्तिमानको नजिक छ । त्यसैले आजको खेल त्यसका लागि निर्णायक बन्न सक्छ । २४ खेलबाट ४४ अंक जोडेको चर्च ब्वाइजेल साविक विजेता मछिन्द्र क्लबमाथि पाँच अंकको अग्रता बनाएको छ ।

उता पूर्वविजेता थ्री स्टार २४ खेलबाट २८ अंकसहित १२औं स्थानमा छ र रेलिगेसनको चिन्तासमेत छ । १३औं स्थानको फ्रेण्ड्सभन्दा थ्री स्टार दुई अंङ्कले मात्र अघि छ । यस्तोमा थ्री स्टार पनि जित निकाल्ने योजनामा हुनेछ । हारेल भने थ्री स्टारलाई पनि रेलिगेसनको चिन्ता बढ्नेछ ।

आजै तीन बजे एन्फा कम्प्लेक्समा विभागीय डर्बीमा नेपाल पुलिस क्लब र त्रिभुवन आर्मी एफसी भिड्नेछन् । लिगमा कमजोर सुरुवात गरेपनि विदेशी खेलाडीको आगमनपछि सानदार प्रदर्शन गर्दै चौथो स्थानसम्म उक्लेको छ । पुलिसले शीर्ष तीनमा लिग सकाउने लक्ष्यमा छ ।

आर्मी २४ खेलबाट ३० अंकसहित ११औं स्थानमा छ ।

यस्तै ३ बजे नै च्यासल रंगशलामा पूछारमा रहेको एफसी खुमलटार र एपीएफ फुटबल क्लबबीच खेल हुनेछ । नवप्रवेशी खुमलटारको लागि यो खेल गर या मरको अवस्थामा छ । पछिल्लो समयम लगातार कमजोर प्रदर्शन गरेको खुमलटार एपीएफसँग पराजित भए एक खेल अघि नै रेलिगेसनमा पर्नेछ । त्यसैले एपीएफविरुद्ध खेल्दा खुमलटार दबाबमा हुनेछ ।

 २४ खेलबाट खुमलटारको २४ अंक नै छ ।

आजको अन्तिम खेल साँझ ६ बजे दशरथ रंगशालमा जावालखेल युथ क्लब र सातदोबाटो युथ क्लबबीच हुनेछ । अघिल्लो खेलमा चर्च ब्वाइजसँग हारेपछि उपाधि होडबाट बाहिरिएको जावलाखेलको लक्ष्य अब सबेसम्म माथि रहेर लिग सकाउने छ ।

२४ खेलबाट ३७ अंकसहित जावलाखेल तेस्रो स्थानमा छ । आज सातदोबाटोलाई हराएर जावलाखेल दोस्रो स्थानमा उक्लनेछ ।

लिगमा उत्कृष्ट सुरुवात गर्दै कुनै समय उपाधि दाबेदारकै रुपमा रहेको सातदोबाटोले पछिल्लो समय लय कायम राख्न नसक्दा पछि परेको छ । सातदोबा६ २४ खेलबाट ३२ अंकसहित पाँचौ स्थानमा छ ।

source https://www.onlinekhabar.com/2023/06/1318257