विदेशबाट फर्केकाको खोजी थाल्न प्रदेश प्रहरी कार्यालयको परिपत्र

२० चैत, कैलाली । प्रहरीले विदेशबाट सुदूरपश्चिम प्रदेशअन्तर्गतका जिल्लामा फर्किएका व्यक्तिहरूको खोजी थालेको छ ।

यही चैत ४ गते कतार एयरवेजबाट १ सय ५८, ६ गते एयरअरेवियाबाट १ सय ७० र चैत ७ गते भारतीय विमानबाट १ सय ३० जना यात्रु नेपाल आएका थिए । उनीहरूमध्ये ४ जनामा कोरोना पोजेटिभ देखिएको छ ।

विमानमा रहेकाहरूमा पनि संक्रमणको जोखिम रहेको भन्दै प्रहरीले यात्रुको खोजी थालेको प्रदेश प्रहरी कार्यालयका निमित्त प्रमुख प्रहरी वरिष्ठ उपरीक्षक देवबहादुर बोगटीले बताए।

तीनवटा विमानमार्फत आएकाहरूलाई निगरानीमा राख्न सुदूरपश्चिमका ९ जिल्लामा परिपत्र गरिएको उनले जानकारी दिए ।

‘विदेशबाट आएका धेरै हाम्रो सम्पर्कमा आइसकेका छन्,’ उनले भने, ‘केही अझै सम्पर्कमा छैनन् । उनीहरूको खोजी भइरहेको छ ।’

जिल्ला प्रहरी कार्यालय कैलालीका प्रहरी नायब उपरीक्षक दक्षकुमार बस्नेतले विदेशबाट आएकाहरूको खोजी तीव्र पारिएको बताए ।

source https://www.onlinekhabar.com/2020/04/850240