नयाँ बर्षमा फेरि सुनसान हल, जोखिम मोल्न तयार भएनन् निर्माता

गतबर्षको चैत्र २८ गते ‘प्रेमगीत ३ र चपली हाइट ३’ले प्रदर्शन मिति तय गरेका थिए । नयाँ बर्षमा चलचित्र रिलिज गर्दा दर्शकको बाक्लो भीड हुने भएकाले पनि निर्माताहरुका लागि यो मिति प्रिय मानिन्छ ।

गतबर्ष पनि नयाँ बर्षको छेकोमा चलचित्र रिलिज गरेर लगानी सुरक्षित गर्ने उत्साहमा थिए निर्माता । तर, विश्व बजारमा फैलिएको कोभिड १९ का कारण सरकारले चैत्र ११ गतेबाट लकडाउन गर्यो । नयाँ बर्षमा चलचित्र रिलिज हुन पाएनन् ।

यो बर्ष पौष २६ गतेबाट सरकारी निर्णयसँगै हलहरु संचालनमा आए । तर, पनि ५० प्रतिशतको अकुपेन्सी भने हटेको थिएन । चैत्र २७ गतेलाई प्रदर्शन मिति तोक्दै ‘कृष्णलीला र लप्पन छप्पन २’ले प्रचार सुरु गरिसकेका थिए । दुबै चलचित्रको ट्रेलर पनि सार्वजनिक भैसकेको थियो ।

तर, चैत्र लागेसँगै विश्व बजारमा फेरि कोरोना केस बढ्न थाल्यो । जसलेगर्दा, नयाँ बर्षमा चलचित्र रिलिज गर्ने जोखिम निर्माताले लिन चाहेनन् । चलचित्र ‘लप्पन छप्पन २’को निर्माणपक्षले यो मितिबाट पछि हट्ने निर्णय गर्यो । अब, चैत्र २७ गते नै रिलिज हुने भनिएको चलचित्र ‘कृष्ण लीला’ पनि यो मितिमा नआउने पक्का भएको छ ।

न नयाँ नेपाली, न विदेशी चलचित्र । नयाँ बर्षमा फेरि हल सुनसान हुने भएका छन् । नेपाली चलचित्र क्षेत्रले १ बर्षदेखि भोगेको नियती रोकिएको छैन । यसले, चलचित्र क्षेत्रलाई केही बर्ष पछाडि धकेल्ने त पक्का छ । अर्कोतिर, चलचित्र क्षेत्र कहिले सामान्य अवस्थामा फर्किन्छ भन्ने अड्कल लगाउन सकिने अवस्था छ्रैन ।

source https://www.onlinekhabar.com/2021/04/942353