दुर्घटना नगराउने चालकलाई सम्मान गर्दै ट्राफिक

१२ असोज, काठमाडौं । महानगरीय ट्राफिक महाशाखा, काठमाडौंले अहिलेसम्म दुर्घटना नगराएका चालकलाई सम्मान गर्ने भएको छ ।

नजिकिँदै गरेको वडादशैं, तिहार तथा छठजस्ता पर्वलाई लक्षित गरेर ट्राफिकले थालेको दुर्घटना अभियानअन्तर्गत सवारी चालकलाई सम्मान गर्न लागिएको हो ।

‘दुर्घटना न्यूनीकरणका लागि सन्देश दिने हिसाबले आज बिहान ७ जना चालकलाई सम्मान गर्दैैछौं’, महाशाखाका एसपी रविकुमार पौडेलले भने, ‘हामी असल चालकलाई प्रमाणपत्र र पुरस्कारसहित सम्मानित गर्नेछौं ।’

सम्मान पाउनेमा विशेषतः लामो दूरीका सवारी चालक छन् । बसपार्कमा आयोजना हुने कार्यक्रममा चाकललाई उत्प्रेरणाका लागि भनेर फूल, माला लगाइदिएर बिदाई समेत गरिने पौडेलले अनलाइनखबरलाई बताए ।

उनका अनुसार कार्यक्रममा प्रहरी महानिरीक्षक सर्वेन्द्र खनाल पनि उपस्थित हुनेछन् ।

source https://www.onlinekhabar.com/2019/09/799948