बाल कलाकारको रुपमा अभिनय थाल्ने चर्चित अभिनेत्रीहरु

काम गर्ने दृष्टिकोणले बलिउड एउटा निकै नै गाह्रो ठाउँ हो । पहिलो कुरा त त्यहाँ  ब्रेक पाउनै मुश्किल हुन्छ । यदि काम पाइयो भने पनि त्यहाँ टिकिरहन झनै मुश्किल हुन्छ । यो कुरा बाल कलाकारहरुको प्रसंगमा त अझ बढी सत्य सावित हुन्छ । थुप्रै प्रतिभाशाली बाल कलाकारहरु बलिउडका गल्लीहरुमै हराउ“छन् । तर, आज हामी ती अभिनेत्रीहरुको बारेमा चर्चा गर्दैछौं, जसले सानो उमेरमै फिल्मी संसारमा कदम राखेका थिए । बाल कलाकारको रुपमा अभिनय यात्रा प्रारम्भ गरे पनि यिनीहरु हराएनन्, उल्टो अघि बढेर आफ्नो क्षमता अनुरुपको पहिचान बनाउन सफल भए ।

आलिया भट्ट

बलिउडकी लोकप्रिय अभिनेत्री आलिया भट्टलाई दर्शकहरुले करण जौहरको फिल्म ‘स्टुडेन्ट अफ द इयर’ मार्फत पहिलो पटक अभिनेत्रीको रुपमा देखेका हुन् । तर उनी सन् १९९९ मै प्रदर्शन भएको फिल्म ‘संघर्ष’ मा देखिएकी थिइन् । उक्त फिल्ममा आलियाले अभिनेत्री प्रीति जिन्टाको बाल्यकालको भूमिका निर्वाह गरेकी थिइन् । त्यस बेला आलिया केवल ६ वर्षकी थिइन् ।

श्रुति हसन

त्यसो त अभिनेत्री श्रुति हसनले सन् २००९ मा प्रदर्शन भएको फिल्म ‘लक’ मार्फत बलिउडमा डेब्यू गरेकी थिइन् । तर, ठूलो पर्दामा उनी पहिलो पटक सन् २००० मा प्रदर्शन भएको फिल्म ‘राम’ मा देखिएकी थिइन् । उक्त फिल्मको मुख्य भूमिका उनकै बुवा कमल हसनले निर्वाह गरेका थिए ।

तब्बू

सन् १९९४ मा फिल्म ‘विजयपथ’का लागि फिल्म फेयरको बेस्ट डेब्यू अवार्ड जित्न सफल अभिनेत्री तब्बूले त्योभन्दा करिव ९ वर्षअघि नै फिल्ममा डेब्यू गरिसकेकी थिइन् । उनी सन् १९८५ मा प्रदर्शन भएको देवानन्दको फिल्म ‘नौजवान’ मा देवानन्दकी कान्छी बहिनीको भूमिकामा अभिनय गरेकी थिइन् । यसबाहेक तब्बूको मुख्य अभिनेत्रीको रुपमा अभिनय गरेको पहिलो फिल्म भने तेलुगू भाषाको ‘कुली नम्बर वन’ थियो ।

श्रीदेवी

बलिउडमा रुपकी रानीको उपनामले चर्चित अभिनेत्री श्रीदेवीले पनि निकै कम उमेरदेखि नै फिल्मी संसारसँग सम्बन्ध गाँसेकी थिइन् । श्रीदेवीले बाल कलाकारको रुपमा पहिलो पटक तमिल फिल्ममा अभिनय गरेकी थिइन् । त्यो बेला उनको उमेर केवल चार वर्षको थियो ।

फातिमा सना शेख

दंगल गर्लको उपनामले चर्चित अभिनेत्री फातिमा सना शेखले सन् १९९७ मा प्रदर्शन भएको कमल हसनको फिल्म ‘चाची ४२०’ मार्फत फिल्मी क्षेत्रमा बाल कलाकारको रुपमा कदम राखेकी थिइन् ।

नितु सिंह

७० को दशककी उत्कृष्ट अभिनेत्रीको रुपमा रहिसकेकी नितु सिंहले सन् १९६६ मा प्रदर्शन भएको फिल्म ‘सूरज’ मार्फत ठूलो पर्दामा डेब्यू गरेकी थिइन् । फिल्म ‘दो कालिया’बाट चर्चित भएकी यी बाल कलाकारलाई त्यतिबेला ‘बेबी सोनिया’ नामले समेत चिनिन्थ्यो । बाल कलाकारको रुपमा नितुले धेरै वटा फिल्ममा अभिनय गरेकी थिइन् ।

कोंकणा सेन शर्मा

अभिनेत्री कोंकणा सेन शर्माले निर्देशकको रुपमा समेत आफूलाई स्थापित गराइसकेकी छिन् । सन् २००३ मा प्रदर्शन भएको फिल्म ‘मिस्टर एण्ड मिसेज अय्यर’ तथा सन् २००५ मा प्रदर्शन भएको फिल्म ‘पेज थ्री’ मार्फत दर्शकको मन जित्न सफल कोंकणा बंगाली भाषाका फिल्महरुकी स्थापित कलाकार थिइन् । उनले पनि बाल कलाकारको रुपमा अभिनय गरेकी थिइन् । उनले अभिनय गरेको पहिलो फिल्म १९८३ मा प्रदर्शन भएको थियो । बंगाली भाषाको फिल्म ‘इन्दिरा’ मा उनले बाल कलाकारको रुपमा अभिनय गरेकी थिइन् ।

हंसिका मोटवानी

ऋतिक रोशनको फिल्म ‘कोई मिल गया’ मा उनकी एउटी सानी साथी छिन्, उनको नाम हो हंसिका मोटवानी । उनी आज दक्षिण भारतीय फिल्मकी लोकप्रिय अभिनेत्री बनिसकेकी छन् । त्यसो त हंसिकाले अभिनेत्रीको रुपमा अभिनय गरेको पहिलो फिल्म हिन्दी भाषामै बनेको थियो । संगीतकार हिमेश रेशमियाको फिल्म ‘आपका सुरुर’ मार्फत अभिनेत्रीको रुपमा डेब्यू गर्ने हंसिका अहिले दक्षिण भारतीय फिल्ममै व्यस्त छिन् ।

उर्मिला मातोडकर

रामगोपाल बर्माको फिल्म ‘रंगीला’ मार्फत अभिनेत्रीको रुपमा डेब्यू गर्ने उर्मिला मातोडकरलाई बलिउडमा ‘रंगीला गर्ल’कै उपनामबाट चिनिन्छ । हाल उनी अभिनयबाट समेत टाढिएर राजनीतिकर्मीको रुपमा स्थापित हुँदैछिन् । तर फिल्ममा भने उनले पनि बाल कलाकारकै रुपमा आफ्नो अभिनय यात्रा प्रारम्भ गरेकी थिइन् । उनले बाल कलाकारको रुपमा अभिनय गरेको पहिलो फिल्म थियो ‘मासुम’, जुन सन् १९८३ मा प्रदर्शन भएको थियो । उक्त फिल्ममा उर्मिलाले शबाना आजमी तथा नसरुद्दीन शाहकी छोरी पिंकीको भूमिका निर्वाह गरेकी थिइन् ।

सना सइद

सन् १९९८ मा प्रदर्शन भएको शाखरुख खानको फिल्म ‘कुछ कुछ होता है’ मा शाखरुख खानकै छोरीको भूमिका निर्वाह गर्ने बाल कलाकार हुन् सना सइद । सनाले ठूली भएपछि सन् २०१२ मा प्रदर्शन भएको आलिया भट्ट–वरुण धवन स्टारर फिल्म ‘स्टुडेन्ट अफ द इयर’ मा तान्या इसरानीको भूमिका निर्वाह गरेकी थिइन् । त्यसो त अगाडि गएर सनाले फिल्मको तुलनामा टेलिभिजन बढी सफलता पाइन् ।

पूजा रुपारेल

बलिउडको अत्यधिक सफल फिल्म ‘दिलवाले दुल्हनिया“ ले जाएंगे’ मा छुट्कीको भूमिका निर्वाह गर्ने बाल कलाकार हुन् पूजा रुपारेल । सन् १९९५ मा प्रदर्शन भएको उक्त फिल्ममा पूजाले अभिनेत्री काजोलकी कान्छी बहिनीको भूमिका निर्वाह गरेकी थिइन् । ठूली भएपछि पूजाले अनिल कपूरको एउटा अन्तर्राष्ट्रिय सिरीमा अभिनय गरिरहेको देखिएको थियो ।

आयशा टाकिया

फिल्म ‘टार्जनः द वन्डर कार’ मार्फत बलिउडमा डेब्यू गर्ने अभिनेत्री आयशा टाकियाले पनि ग्ल्यामर क्षेत्रमा बाल्यकालदेखि नै कदम राखेकी हुन् । एउटा इनर्जी ड्रिङ्क्सको विज्ञापनमा उनी भन्ने गर्थिन्—‘आई एम अ कम्प्लेन गर्ल ।’ आज टार्जन द वन्डर कारपछि आयशाले वान्टेड, दिल मा“गे मोर, डोर, सण्डे, पाठशाला, सलाम ए इश्क, क्या लभ स्टोरी है जस्ता फिल्ममा अभिनेत्रीको रुपमा काम गरिसकेकी छिन् ।

अमृता प्रकाश

सन् २००१ मा प्रदर्शन भएको निर्देशक अनुभव सिन्हाको फिल्म ‘तुम बिन’ मा मिलीको चरित्र निर्वाह गर्ने बाल कलाकार अमृता प्रकाश अहिले निकै ठूली र राम्री भएकी छिन् । अमृताले अचेल थुप्रै हिन्दी धारावाहिक श्रृंखलाहरुमा अभिनय गरिरहेकी छिन् ।

source https://www.onlinekhabar.com/2019/09/792607