१५ वर्ष कान्छा प्रेमीसँग विवाह गर्दै सुष्मिता सेन

अक्सर विवाहको लागि आफुभन्दा कम उमेरका श्रीमती खोज्ने अघोषित परम्परा नै छ । त्यसैले विवाहित दम्पतीबीच श्रीमान् भन्दा श्रीमतीको उमेर कम हुनेगर्छ । श्रीमती भन्दा कान्छो श्रीमान हुनुलाई अपवाद मानिन्छ ।

यद्यपी पछिल्लो समय भने श्रीमानको र श्रीमतीबीचको उमेर अन्तर ठिक उल्टो हुँदैछ । अर्थात श्रीमान् भन्दा श्रीमती जेठी । प्रसंग बलिउडको । बलिउड अभिनेत्री सुष्मिता सेन विवाह गर्दैछिन् । यत्तिका उमेरमा सुष्मिताले विवाह गर्ने खबर आफैमा रोचक छ भने उनका हुनेवाला श्रीमानबीचको उमेर अन्तर अर्को रोचक छ ।

यी अभिनेत्री यतिबेला रोहमन शलसंगको प्रेममा रमाइरहेकी छिन् । दुबै प्रायः एकसाथ देखिन्छन् । पारिवारिक जमघट होस् अथवा पारिवारिक विदा मनाउने अवसर होस्, उनीहरु प्रायः सँगै नै हुन्छन् ।

एउटा समाचारमा जनाइए अनुसार यी दुबैले यसै वर्षको नोभेम्बर महिनामा विवाह गर्दैछन् । उक्त समाचारमा जनाइए अनुसार रोहमन र सुष्मिताले यो वर्षको अन्त्यसम्ममा विवाह गर्ने योजना बनाएका छन् । रोहमनले सुष्मितालाई यसअघि नै विवाहको प्रस्ताव राखिएका छन् भने सुष्मिताले पनि उनको प्रस्ताव स्विकारीसकेकी छिन् ।

यो भन्दा पनि रोचक कुरा के छ भने केही समय अघिमात्र यी दुईबीच ब्रेकअप भएको समाचार सार्वजनिक भएको थियो । रोहमनले आफ्नो इन्स्टाग्राममा एउटा पोस्ट शेयर गरेका थिए । त्यसपछि उनीहरुको ब्रेकअपको हल्ला चलेको हो ।

त्यसको केही समयपछि नै अभिनेत्री सेनले दुबै जनाको एउटा मायालु तस्वीर सामाजिक सञ्जालमा शेयर गरिन् । जसले के कुरा स्पष्ट भयो भने उनीहरु अलग भएका छैनन् । दुबैबीचको प्रेम सम्बन्ध कायम छ । हालै मात्र सुष्मिता सेनका भाइ राजीवको विवाहमा पनि रोहमन देखा परेका थिए ।

उक्त वैवाहिक समारोहका थुप्रै तस्बिर तथा भिडियोहरु सार्वजनिक भएका थिए, जसमा दुबै रमाइलो मूडमा देखिएका थिए ।

रोचक कुरा के छ भने रोहमन र सुष्मिताको उमेरमा निकै अन्तर छ । रोहमन, सुष्मिता भन्दा करिव १५ वर्ष कान्छा छन् ।

source https://www.onlinekhabar.com/2019/08/784864