२५ औं प्रकाश मानव अधिकार पुरस्कार बराललाई

१५ साउन, काठमाडौं । २५ औँ प्रकाश मानव अधिकार पुरस्कार मोरङका बराललाई गुरुप्रसाद बराललाई प्रदान गरिने भएको छ । शोषण, विपन्नता, विभेद एवम् कुरीतिमुक्त सुन्दर नेपाल निर्माणको अभियानमा जीवनको झण्डै पाँच दशक समर्पण गरेको भन्दै इन्सेकले बराललाई पुरस्कृत गर्ने निर्णय गरेको हो ।

इन्सेकका महासचिव रमेशचन्द्र पौडेल संयोजक तथा कोषाध्यक्ष गीता बराल र नीलमशेखर अधिकारी सदस्य रहेको प्रकाश मानव अधिकार पुरस्कार छनौट समितिले बराललाई प्रकाश पुरस्कारबाट सम्मानित गर्ने निर्णय गरेको हो ।

२०७६ साल साउन १६ गते प्रदेश १ का प्रदेश प्रमुख प्रा. डा. माननीय गोविन्दबहादुर तुम्बाहाङको प्रमुख आतिथ्यमा विराटनगरमा हुने समारोहमा बराललाई सम्मान गरिने इन्सेक अध्यक्ष इन्दिरा श्रेष्ठले जानकारी दिइन् ।

इन्सेकका संस्थापक महासचिव प्रकाश काफ्लेको २०४९ साल साउन १६ गते नुवाकोटको घोप्टेभिरमा थाइ एयर दुर्घटनामा निधन भएको थियो । नेपालको मानव अधिकार र सामाजिक न्यायको अभियानमा उनले पुर्‍याएको योगदानको स्मरणलाई चिरस्थायी बनाउने उद्देश्यले इन्सेकले ‘प्रकाश मानव अधिकार पुरस्कार’ स्थापना गरेको हो । पुरस्कारको राशी ५० हजार नगद र सम्मानपत्र छ ।

नेपालको मानव अधिकार, राजनीति, शिक्षा, स्वास्थ्य तथा सामाजिक लगायतका क्षेत्रमा विशिष्ट योगदान गरेका व्यक्तित्वलाई प्रकाश स्मृति दिवसको अवसर पारेर पुरस्कृत गरिन्छ । यो पुरस्कारबाट हालसम्म २४ जना पुरस्कृत भइसकेको इन्सेकले जनाएको छ ।

source https://www.onlinekhabar.com/2019/07/784637