भारतीय कफी टाइकुन सिद्धार्थको शव भेटियो

१५ साउन, काठमाडौं । दुई दिनदेखि हराइरहेका ‘क्याफे कफी डे’का संस्थापक वीजी सिद्धार्थको शव भेटिएको छ ।

सिद्धार्थको शव बुधबार विहान नेत्रावती नदीको पुल नजिकै भेटिएको भारतीय सञ्चार माध्यमहरुले जनाएका छन् । मंगलुरुका पुलिस कमिश्नर संदीप पाटिलका अनुसार हुइगेबजार नजिकै नदीमा तैरिरहेको अवस्थामा उनको शव भेटिको हो ।

परिवारका सदस्यहरुले उनको शव भएको पुष्टि गरेपछि अस्पताल लैजाने प्रहरीको तयारी छ ।

सिद्धान्त भारतको क्याफे कफी डेका सबैभन्दा ठूलो रिटेल चेनका मालिक थिए । उनी सोमबार साँझ ७ बजेदेखि सम्पर्कविहीन भएका थिए । उनले ड्राइभरलाई नदीको पुलमा गाडी रोक्न लगाएका थिए । उनले भनेका थिए- पुलमा टहलिन चाहन्छु । आधा घन्टासम्म पनि नआएपछि फोन गरेको तर नउठेको उनका ड्राइभरले बताए । त्यसपछि परिवारले उनको खोजी थालेको थियो ।

उनी कर्नाटकका पूर्वमुख्यमन्त्री एसएम कृष्णाका ज्वाइँ पनि हुन् ।

प्रहरीले सुसाइड नेाट पनि भेटाएको छ, जुन सिद्धार्थकै भएको पुष्टि भएको प्रहरीले जनाएको छ ।

क्याफे कफी डे परिवार र निर्देशकलाई सम्बोधन गरिएको सिद्धार्थको पत्रमा लेखिएको छ, ‘म लामो समयदेखि संघर्ष गरिरहेँ, तर अब सम्भव रहेन । म आफ्नो प्राइभेट इक्विटी पार्टनर र अन्य ऋणदाताको दबाव झेल्न सक्दिनँ । इनकम ट्याक्सका एक महानिर्देशकको उत्पीडन पनि सामना गर्नु परेको छ ।’

इनकम ट्याक्स डिपार्टमेन्टले भने आफ्नो कारवाहीको बचाउ गर्दै पत्रको सत्यतामाथि शंका गरेको छ ।

भारतीय सञ्चार माध्यमहरुकाअनुसार पत्रमा सिद्धार्थले सबै गल्तीका लागि आफू जिम्मेवार रहेको बताएका छन् । उनले भनेका छन्, ‘मेरो उद्देश्य कहिल्यै धोका दिने थिइन । मलाई आश छ कि एक न एक दिन तपाईले यो सम्झनु हुनेछ ।’

source https://www.onlinekhabar.com/2019/07/784615