टर्कीमा बढ्दो गर्मीका कारण आगलागी, ७ जनाको मृत्यु

१७ साउन, काठमाडौं । टर्कीमा बढ्दो गर्मीका कारण जंगलमा डढेलो लाग्दा हालसम्म कम्तीमा सात जनाको मृत्यु भएको छ ।

समाचार एजेन्सी रोयटर्सका अनुसार स्याटेलाइटबाट प्राप्त तस्वीरमा मर्सिन र एन्टालयामा लागेको आगोको धुवाँ १५० किलोमिटर टाढा साइप्रस द्वीपसम्म पुगेको देखिएको छ ।

टर्कीमा गर्मी मौसममा डढेलो लाग्नु सामान्यजस्तै मानिन्छ । तर सरकारी अधिकारीहरुले यसपटकको डढेलो ठूलो क्षेत्रमा फैलिएको बताएका छन् ।

टर्कीको कृषि एवम् वनमन्त्रीले भनेअनुसार हालसम्म आगलागीका ९८ घटना आएका छन् । तीमध्ये ८८ स्थानको आगो नियन्त्रणमा लिइएको छ ।

यस समय टर्कीका दक्षिणी क्षेत्रमा तटीय प्रान्तहरु जस्तै अदाना, उस्मानिया, एन्टाल्या, मर्सिनमा आगो लागेको छ । पश्चिमी तटीय प्रान्त मुगलामा पनि आगो लागेको घटना सार्वजनिक भएको छ ।

टर्कीका मौसमविदका अनुसार भूमध्यसागरीय तटीय क्षेत्रमा तापक्रम औसतमा ४ देखि ६ डिग्री सेल्सियस बढ्न सक्ने अनुमान गरिएको छ ।

source https://www.onlinekhabar.com/2021/08/992084