फरेस एल बाखले जिते कतारका लागि पहिलो ओलम्पिक स्वर्ण

१७ साउन, काठमाडौं । कतारका फरेस एल बाखले जापानमा भइरहेको टोकियो ओलम्पिक अन्तर्गत पुरुष वेइटलिफ्टिङ ९६ केजीमा ओलम्पिक कीर्तिमानसहित स्वर्ण जितेका छन् ।

उनले कूल ४०२ केजी भार बहन गर्दै ओलम्पिक कीर्तिमान बनाए । एल बाखले स्न्याचतर्फ १७७ केजी भार उठाएका थिए भने क्लिन एण्ड जर्कतर्फ २२५ केजी भार उठाए ।

उनले क्लिन एण्ड जर्ककमा कीर्तिमान बनाएका हुन् ।

एल बाखको स्वर्ण कतारले ओलम्पिकमा जितेको अहिलेसम्मकै पहिलो स्वर्ण हो । यसअघि कतारले रजत र कास्य मात्र जितेको थियो ।

यस इभेन्टमा भेजेजुएलाका जिओभान भालेनिला सान्चेजले कूल ३८७ केजी भार उठाउँदै रजत जिते । उनले स्न्याचमा १७७ र क्लिन एण्ड जर्कमा २१० केजी भार उठाए ।

कांस्य जितेका जर्जियाका एन्टोन प्लेसनोइले पनि स्न्याचमा १७७ र क्लियन एण्ड जर्कमा १७७ केजी भार उठाए ।

 

source https://www.onlinekhabar.com/2021/08/992116