डब्ल्युएचओको चेतावनी : अब डेल्टाले मृत्युको जोखिम बढाउन सक्छ

विश्व स्वास्थ्य संगठन (डब्ल्युएचओ)ले विश्वभर अनियन्त्रित रुपमा बढिरहेको कोरोना संक्रमणलाई लिएर चिन्ता व्यक्त गरेको छ । उसले सबै मुलुकलाई चेतावनी दिदै भनेको छ, यदि खोप अभियान तिब्र रुपमा पुरा गरिएन भने डेल्टा समेत कोरोनाको नयाँ भेरियन्टले वर्तमान धेरैको ज्यान लिनसक्छ ।

डब्ल्युएचओका इमर्जेन्सी डाइरेक्टर माइकल रेयानले भनेका छन्, ‘डेल्टा भेरियन्ट हाम्रो लागि ठूलो चुनौती भएको छ । यसलाई हराउनका लागि हामीले चाडो भन्दा चाडो पहल गर्नुपर्नेछ । खोप अभियानलाई अरु तिब्र बनाउनुपर्नेछ ।’

डेल्टा भेरियन्टको खतरनाक परिणामलाई मूल्यांकन गर्दै डब्ल्युएचओले यसलाई तत्काल रोक्न नसके ठूलो क्षति हुने चेतावनी दिएको हो ।

तिब्र रुपमा फैलिइरहेको डेल्टा भेरियन्ट अहिलेसम्म एक सय ३२ मुलुकमा फैलिइसकेको छ । डब्ल्युएचओले सेप्टेम्बरको अन्तिमसम्म सबै देशसँग अपिल गरेका छन्, कम्तीमा आफ्नो मुलुकको कुल जनसंख्याको १० प्रतिशतलाई खोपको पुरा डोज लगाउनु पर्नेछ । र, सालको अन्त्यसम्ममा कुल जनसंख्याको ४० प्रतिशतलाई पूर्ण खोप लगाइसक्नु जरुरी छ ।

डब्ल्युएचओका प्रमुख टेड्रोस अधनोम घ्रेबेसिसले भनेका छन्, अहिलेसम्म चार भेरियन्टको चिन्ता छ । जबसम्म कोरोना फैलिइरहन्छ यसको नयाँ नयाँ भेरियन्ट पनि आउने जोखिम छ । उनले भनेका छन् पछिल्लो चार हप्तामा औसत ८) प्रतिशतको दरले संक्रमण बढिरहेका छन् ।

विश्वभर कोरोना भाइरस महामारी संक्रमितको संख्या बढेर १९ दशमलव ६६ करोड पुगेको छ । यसबाट अहिलेसम्म ४१ दशमलव ९९ लाख भन्दा बढीले ज्यान गुमाइसकेका छन् । विश्वमा सबैभन्दा बढी कोरोनाको कहर अमेरिकामा देखिएको छ । अहिलेसम्म त्यहाँ ३ दशमलव ४७ करोड भन्दा बढी कोरोना संक्रमित भइसकेका छन् र ६ लाख बढीको मृत्यु भएको छ ।

source https://www.onlinekhabar.com/2021/07/991875