डाइभर्सन बगेपछि बुटवल-बर्दघाट सडकखण्ड अवरूद्ध

१६ असार, काठमाडौं । बाढीले डाइभर्सन बगाएपछि पूर्वपश्चिम राजमार्गअन्तर्गत बुटवल-बर्दघाट सडकखण्ड अवरूद्ध भएको छ ।

नवलपरासीको सुनवल नगरपालिका वडा नम्बर-१३ बडेरास्थित डाइभर्सन मंगलबार राति आएको बाढीले बगाएको हो ।

डाइभर्सन बगाएपछि बुधबार बिहान साढे ४ बजेदेखि बुटवल-बर्दघाट सडकखण्ड अवरूद्ध भएको लुम्बिनी प्रदेश ट्राफिक प्रहरी कार्यालय बुटवलले जनाएको छ ।

यसैगरी तनहुँको म्याग्देस्थित थर्पुमा पहिरो खसेपछि अवरुद्ध भएको पृथ्वी राजमार्ग केहीबेर अगाडि खुलेको छ । लेदो माटोका कारण १२ चक्के ठूलो गाडी फसेपछि राजमार्ग अवरुद्ध भएको थियो । इलाका प्रहरी कार्यालय थर्पुका अनुसार पहिरो पन्छाएर फसेको गाडीसमेत निकालेपछि सडक खुलेको छ ।

यसैगरी पोखरा-बागलुङ सडकखण्ड अन्तर्गत पर्वतको कुश्मा-१ सहर्षधारामा मंगलबार बिहान २ बजे खसेको पहिरो पन्छाएपछि बिहान ६ बजेदेखि सडक खुलेको छ ।

यो पनि पढ्नुहोस राजमार्गको यात्रा : भोकको महाभारत र निदाएको प्रशासन

source https://www.onlinekhabar.com/2021/06/976455