सुआरेजको दुई गोल, एट्लेटिकोलाई १० अंकको अग्रता

१९ माघ, काठमाडौं । लुइस सुआरेजको दुई गोल मद्दतमा लिग लिडर एट्लेटिको मड्रिडले स्पानिस ला लिगामा काडिजलाई ४-२ ले पराजित गरेको छ ।

काडिजको मैदानमा भएको खेलमा सउल निगेज र कोकेले एक-एक गोल थपे ।

काडिजका लागि दुवै गोल अल्भारो नेग्रेडोले गरे पनि टिमको हार टार्न सकेनन् ।

खेलको २८ औं मिनेटमा सुआरेजले गोल गर्दै टोलीलाई अग्रता दिलाएका थिए । ३५ औं मिनेटमा नेग्रेडोले काडिजका लागि बराबरी गोल फर्काए ।

तर ४४ औं मिनेटमा सउल निगुएजले गोल गर्दै एट्लेटिकोलाई पहिलो हाफमा २-१ को अग्रता दिलाए ।

५० औं मिनेटमा सुआरेजले व्यक्तिगत दोस्रो गोल गर्दै एट्लेटिकोलाई ३-१ को अग्रता दिलाए । उनले पेनाल्टीमा गोल गरे ।

७१ औं मिनेटमा नेग्रेडोले व्यक्तिगत दोस्रो गोल गर्दै गोलअन्तरमा ३-२ मा झारेका थिए ।

तर ८८ औं मिनेटमा कोकेले गोल गरेपछि एट्लेटिकोले ४-२ को सहज जित हात पारेको हो ।

जितपछि एट्लेटिकोले १९ खेलबाट ५० अंक जोडेको छ । जुन बार्सिलोना र रियल मड्रिडभन्दा १० अंकले बढी हो ।

एट्लेटिकोले अझै एक खेल कम खेलेको छ । २० खेलबाट समान ४० अंक जोडेको बार्सिलोना र रियल मड्रिड क्रमश: दोस्रो र तेस्रो स्थानमा छन् । काडिज २४ अंकसहित १३ औं स्थानमा छ ।

source https://www.onlinekhabar.com/2021/02/928040