चीन भन्छ- चिनियाँ एपमाथिको प्रतिबन्ध विश्व व्यापार संगठनको उल्लंघन

काठमाडौं । विभिन्न चिनियाँ एपहरु माथि स्थायी प्रतिबन्ध लगाउने भारतको कदम विश्व व्यापार संगठनका सिद्धान्त तथा बजार अर्थतन्त्रका मान्यताको उल्लंघन रहेको चीनले बताएको छ ।

नयाँदिल्लीस्थित चिनियाँ राजदूतावासका प्रवक्ताले बुधबार एक विज्ञप्ती जारी गर्दै भारतीय कदमको आलोचना गरेका छन् ।

भारतले गत जुन महिनामा ५९ वटा चिनियाँ एपमाथि प्रतिबन्ध लगाएको थियो । गत सेप्टेम्बरमा थप १ सय १८ वटा चिनियाँ एप भारतले ब्लक गरेको थियो ।

जुन महिनामा प्रतिबन्ध लगाएका चिनियाँ एपहरुमाथिको प्रतिबन्धलाई स्थायी रुपमा लागू गर्ने निर्णय भारतले हालै गरेको छ ।

सञ्चार माध्यमको प्रश्नमा एक विज्ञप्ती जारी गर्दै चिनियाँ राजदूतावासका प्रवक्ता जी रोंगले भनेका छन्, ‘यी कदमहरु विश्व व्यापार संगठनको अविभेदी सिद्धान्त तथा बजार अर्थतन्त्रको स्वच्छ प्रतिस्पर्धाका सिद्धान्त विपरीत रहेका छन् । यस्ता कदमले चिनियाँ कम्पनीहरुको वैध अधिकार तथा हितमा गम्भीर आघात पुराउँदछ । चीन सरकारले यो कदमको दृढ रुपमा विरोध गर्दछ ।’

प्रवक्ता जी तथा चीन सरकारले चिनियाँ कम्पनीहरुलाई अन्तराष्ट्रिय स्तरमा व्यवसाय सञ्चालन गर्दा अन्तर्राष्ट्रिय कानून तथा स्थानीय नीति नियमहरुको पालना गर्न आग्रह गर्दै आएको छ ।

चिनियाँ एपहरुका गतिविधि भारतको सार्वभौमसत्ता र अखण्डताको विरुद्धमा रहेको ठहर गर्दै भारत सरकारले प्रतिबन्ध लगाएको हो ।

यद्यपि भारतीय सैनिकहरुको ज्यान जाने गरी लद्दाखमा भएको चिनिया र भारतीय सैनिकबीचको झडपपछि भारतले चिनियाँ एपमाथि प्रतिबन्धको घोषणा गरेको थियो ।

–एजेन्सी

source https://www.onlinekhabar.com/2021/02/928062