सालाहको दुई गोलमा लिभरपुलको जित, तेस्रो स्थानमा उक्लियो

१९ माघ, काठमाडौं । मोहम्मद सालाहको दुई गोल मद्दतमा साविक विजता लिभरपुलले प्रिमियर लिगमा वेष्टह्यामलाई ३-१ ले पराजित गरेको छ । सहज जितपछि लिभरपुल अंक तालिकामा तेस्रो स्थानमा उक्लिएको छ ।

वेस्ट ह्यामको मैदानमा लिभरपुललाई जित दिलाउन सालाहले दुई गोल गर्दा जर्जिनियो विज्नाल्डमले एक गोल गरे । वेस्ट ह्यामका क्रेग डसनले एक गोल फर्काए ।

पहिलो हाफ गोलरहित बराबरीमा सकिएको खेलको ५७औं मिनेटमा सालाहले गोल गर्दै लिभरपुललाई अग्रता दिलाएका थिए ।

६८ औं मिनेटमा सालाहले व्यक्तिगत दोस्रो गोल गर्ददा लिभरपुलले २-० को अग्रता बनायो । ८४ औं मिनेटमा विज्नाल्डमले गोल गर्दै लिभरपुललाई ३-० को अग्रता दिलाए । ८७ औं मिनेटमा वेस्ट ह्यामका डसनले सान्त्वना गोल फर्काए ।

जितछि २१ खेलबाट ४० अंक जोडेको लिभरपुल लेस्टर सिटीलाई पछि पार्दै  तेस्रो स्थानमा उक्लिएको छ । वेस्ट ह्याम ३५ अंकसहित पाँचौं स्थानमा यथावत छ ।

लिड्स युनाइटेडसँग पराजित भएपछि लेस्टर सिटीले दोस्रो स्थानमा उक्लने मौका गुमाएको थियो । २१ खलबाट ३९अंक रहेको लेस्टर चौथो स्थानमा छ ।

यस्तै दुई लण्डन क्लब चेल्सी र टोटनहमले पनि जित हात पारेका छन् । टोटनहमले ब्राइटनलाई १-० ले र चेल्सीले बर्नलीलाई २-० ले पराजित गरे ।

टोटनहमको २० खेलबाट ३३ अंक छ भने २१ खेल खेलेको चेल्सीको ३३ अंक छ । गोलअनतरमा अघि रहँदै टोटनहम छैटौं स्थानमा छ भने चेल्सी सातौं स्थानमा छ ।

source https://www.onlinekhabar.com/2021/02/928031