पर्सा र बारामा थप २० जनामा कोरोना पुष्टि

१६ भदौ, वीरगञ्ज । वीरगञ्जमा गरिएको परीक्षणमा थप २० जनामा कोरोना संक्रमण पुष्टि भएको छ । नारायणी अस्पतालको पीसीआर प्रयोगशालामा भदौ १५ गते ४ सय १० वटा स्वाब नमुना परीक्षण गर्दा २० जनामा कोरोना पुष्टि भएको हो ।

जिल्ला प्रशासन कार्यालय पर्साले सार्वजनिक गरेको विवरण अनुसार पीसीआर पोजेटिभ १८ जनामध्ये १८ जना पर्साका र २ जना बाराका छन् ।

यीमध्ये दुई जनामा जीन एक्सपर्ट विधिबाट परीक्षण गर्दा पोजेटिभ देखिएको थियो । जीन एक्सपर्टमा कोरोना पोजेटिभ देखिएको दुवै पुरुष हुन् । उनीहरु मध्ये १ जना पर्सा र एक जना बाराको रहेको प्रशासकीय अधिकृत विनय श्रीवास्तवले जानकारी दिए ।

पछिल्लो पटक १८ जना संक्रमित थपिएसँगै पर्सा जिल्लामा कोरोना संक्रमितको संख्या ३ हजार नाघेको छ । यसअघि पर्सामा ४ सय ९० जना महिलासहित २ हजार १ सय ९४ जनामा कोरोना संक्रमण पुष्टि भइसकेको छ । जसमध्ये २४ जना भारतीय नागरिक, १ सय ३५ जना स्वास्थ्यकर्मी, १ सय ८ जना सुरक्षाकर्मी, १४ जना पत्रकार, १ सय ७ जना कैदी थुनुवा, ४९ जना अस्पतालका सफाइकर्मी, गार्ड, कार्यालय सहयोगी र ३ जना एम्बुलेन्स चालकमा कोरोना देखिएको हो ।

सोमबारका २१ जनासहित हालसम्म पर्सामा ७ सय ५ जना कोरोनामुक्त भइसकेका छन् । अस्थायी कोभिड अस्पतालमा ३१ जना महिलासहित १ सय ६ जना कोरोना संक्रमितको उपचार जारी छ । जसमध्ये २७ जना आइसियूमा छन् । २ सय २३ जना महिलासहित १ हजार १ जना होम आइसोलेसनमा छन् ।

२० हजार २३ जनाको स्वाब संकलन गरिएकोमा ५ सय ५० वटा स्वाब नमुना परीक्षण गर्न बाँकी छ । कोभिड–१९ का कारण पर्सामा मात्रै ३८ जनाको मृत्यु भइसकेको छ ।

source https://www.onlinekhabar.com/2020/09/893152