रेसुङ्गामा नेपाल वायुसेवा निगमको जहाजबाट परीक्षण उडान

१५ वैशाख, गुल्मी ।  गुल्मीको रेसुङ्गा विमानस्थलमा नेपाल वायुसेवा निगमको ट्वीनअटर जहाजले परीक्षण उडान गरेको छ । शुक्रबार बिहान ७ बजेर ४५ मिनेटमा नाइन एन एबिटी कल साइन रहेको जहाजले परीक्षण उडान गरेको हो ।

जहाजका क्याप्टेन मनिस श्रेष्ठले परीक्षण सफल भएको बताए । काठमाडौंबाट यहाँसम्मको दुरी ५० मिनेटको रहेको क्याप्टेन श्रेष्ठले बताए । अब परीक्षण उडानको रिपोर्ट निगमलाई बुझाएपछि नियमित उडानको प्रक्रिया अगाडि बढ्ने श्रेष्ठ बताए ।

रेसुङ्गा विमानस्थल गुल्मीको रेसुङ्गा नगरपालिकाको वडानम्बर–१० को सिमीचौरमा पर्दछ । जिल्ला सदरमुकाम तम्घासबाट करिव ५ किलोमिटर कच्ची बाटो पछि विमानस्थल पुग्न सकिन्छ ।

नगरपालिकाले गरेको सम्झौता अनुसार अब नियमित उडान गर्ने रेसुङ्गा ननगरपालिका नगरप्रमख खिलध्वज पन्थीले बताए । रेसुङ्गा विमानस्थलबाट काठमाडौं सम्मको शुल्क प्रतिव्यक्ति ६ हजार ५ सय भित्रै हुनसक्ने पन्थीले बताए । विमानस्थलमा गत पुस २४ गते तारा एयरको १८ सिट क्षमताको जहाजले पनि सफल उडान गरेको थियो ।

रेसुङ्गा विमानस्थलको धावनमार्गको ५ सय २० मिटर लम्बाइ र २० मिटर चौडाइ छ । १५६ रोपनी जग्गामा फैलिएको विमानस्थलको ७९ रोपनी जग्गा अधिग्रहण गरिएको थियो । विमानस्थलमा हालसम्म निर्माणमा ३५ करोड खर्च भइसकेको छ ।

 

source https://www.onlinekhabar.com/2023/04/1298817