जसपाको विधान अधिवेशनमा पहिचानको मुद्दा पेचिलो बन्ने संकेत

१७ माघ, काठमाडौं । जनता समाजवादी पार्टी (जसपा) नेपालको विधान मस्यौदा समितिले अहिले आफ्नो कामलाई तीव्रता दिएको छ ।

विधान अधिवेशन मूलरुपमा पार्टीले उठाएको पहिचानको मुद्दा र सांगठनिक संरचनाबारे केन्द्रित हुने प्रचार विभाग प्रमुख पूर्ण बस्नेतले जानकारी दिए । गत पुस १८ र १९ गते सम्पन्न जसपाको राजनीतिक समितिको बैठकले पार्टीको विधान अधिवेशन गर्ने निर्णय गरेको थियो ।

पार्टीमा पहिचानको मुद्दाबारे पुनर्विचार गरौं भन्ने आवाज उठ्न थालेकाले यो मुद्दा जसपाको विधान अधिवेशनमा पेचिलो विषय बन्ने संकेत देखिएको बस्नेतले बताए ।

जसपाको हालको विधानमा केन्द्रीय, प्रादेशिक र स्थानीय तहका विभिन्न सांगठनिक संरचनाहरुको व्यवस्था छ । खासगरी पहिचानमा आधारित लिम्बुवान, किरात, मधेश, शेर्पालुङ, नेवा, ताम्सालिङ, मगरात, तमुवान, थरुहट, खसान र दलित/शिल्पी विशेष (१०+१) राष्ट्रिय समितिहरु र सातवटा प्रदेशस्तरीय संरचना (जसपाले भन्ने गरेको प्रशासनिक संरचना) बीच शक्तिको बाँडफाँट र अधिकार क्षेत्रबारे नेताहरुबीच फरक धारणा छन् ।

यी संरचनामध्ये राजकीय मामलामा हाल जसपाले प्रदेशस्तरीय समितिलाई कार्यकारी र पहिचानमा आधारित राष्ट्रिय समितिलाई समन्वयकारी हैसियत प्रदान गरेको छ ।

source https://www.onlinekhabar.com/2023/01/1255727