प्रधानमन्त्री कप महिला क्रिकेट पुस ११ देखि दाङमा आयोजना हुने

१४ मंसिर, काठमाडौं । प्रधानमन्त्री कप महिला क्रिकेट अर्को महिना दाङमा आयोजना गरिने भएको छ । नेपाल क्रिकेट संघ (क्यान)ले महिला क्रिकेट प्रतियोगिता पुस ११ गतेदेखि दाङमा गर्ने गरी तयारी सुरु गरिसकेको छ ।

प्रतियोगिता दाङको लमही क्रिकेट मैदानमा हुनेछ । प्रतियोगिताको लागि क्यानले खेलाडी छनोट गर्न जिल्ला क्रिकेट संघलाई पत्राचार गर्दै सम्पूर्ण प्रादेशिक क्रिकेट संघलाई पनि बोधार्थ गरेको छ ।

प्रतियोगिताको लागि मंसिर २१ गतेभित्र जिल्ला टिम छनोट गरी प्रादेशिक क्रिकेट संघ र क्यानमा जानकारी गराउन भनिएको छ ।

यस्तै क्यानले जिल्ला टिम छनोट गर्नका लागि विभिन्न ६ वटा बुँदा तय गरेको छ ।

जिल्ला टिम तयारीका लागि क्यानले जिल्लालाई २० हजार नगद र एक दर्जन बल उपलब्ध गराउने जनाएको छ । यस्तै संघको पूर्वकार्यक्रम अनुसार यसअघि नै छनोट भइसकेका जिल्ला टिमलाई भने निरन्तरता दिने वा नदिने जिल्ला संघको हुने पनि क्यानले जनाएको छ ।

टिम छनोट गर्दा विवाद रहित तरिकाले निष्पक्ष छनवट गर्ने जिम्मेवारी जिल्ला संघको हुने क्यानले जनाएको छ । कोरोना महामारीका बेला हुन लागेको प्रतियोगिता/छनोट/क्याम्प सम्बन्धी जिल्ला स्थानीय तहबाट स्विकृती लिने जिम्मेवारी जिल्ला संघको हुनेछ ।

यस्तै प्रधानमन्त्री कप प्रादेशिक प्रतियोगिता २०७७ पुस ७ गतेसम्म सम्पन्न गर्नुपर्ने भनिएको छ । त्यसका लागि सम्बन्धित प्रादेशिक क्रिकेट संघ संग समन्वय गर्न जिल्ला संघलाई भनिएको छ ।

जिल्ला टिम छनौटको बिल भर्पाई सहितको प्रतिबेदन संघमा पेश भएपछि मात्र अनुदान रकम निकासा गरिने क्यानले बताएको छ ।

source https://www.onlinekhabar.com/2020/11/912459