डोटीमा एक अर्ब रकम फ्रिज

३ साउन, डोटी । आर्थिक वर्ष २०७८/०७९ मा डोटी जिल्लामा एक अर्ब ५७ लाख ६० हजार तीन सय ६५ रुपैयाँ फ्रिज भएको छ ।

कोष तथा लेखा नियन्त्रण कार्यालय डोटीका अनुसार जिल्लाका कुल बजेटको ११.७७ प्रतिशत फ्रिज भएको हो ।

जिल्लामा पुँजीगततर्फ एक अर्ब ८४ करोड ६८ लाख १५ हजार ५०० बजेट विनियोजन भएकोमा एक अर्व १९ करोड ३५ लाख ८२ हजार ४४५ मात्रै खर्च भएको छ । यो रकम पुँजीगततर्फ कुल विनियोजित रकमको करिब ३५ प्रतिशत मात्रै हो ।

यस्तै आर्थिक वर्ष ०७८/०७९ का लागि जिल्ला विनियोजित ६ अर्ब ७० करोड आठ लाख ३५ हजार ९६५ मध्ये ६ अर्ब ३४ करोड ८३ लाख आठ हजार ५५४ रुपैयाँ खर्च भएको छ । यो रकम कुल चालु रकमको करिब ९५ प्रतिशत हो ।

जिल्लामा सो अवधिमा ५८ करोड २६ लाख ७१ हजार ४७३ रुपैयाँ राजश्व संकलन भएको कोष तथा लेखा नियन्त्रण कार्यालय, डोटीका सूचना अधिकारी जयदेव पन्तले जानकारी दिए ।

स्थानीय तहमा २० करोड बेरुजु

जिल्लाका नौ स्थानीय तहमा संघीय सरकारमार्फत आएको कुल तीन अर्ब १९ करोड ४१ लाख ४० हजार ३०० सयमध्ये २० करोड ५३ लाख ३८ लाख ८८ हजार ३५६ रुपैया फ्रिज भएको छ । यो रकम स्थानीय तहका लागि कुल विनियोजित रकमको ६.४३ प्रतिशत हो ।

स्थानीय तहमा सबैभन्दा बढी बोगटान फुड्सिल गाउँपालिकामा १२.३१ प्रतिशत रकम फ्रिज भएको छ ।

कोलेनिकाले उपलब्ध गराएको विवरण अनुसार यस गाउँपालिकामा ३२ करोड ६२ लाख १५ हजार रकम विनियोजन भएकोमा चार करोड एक लाख ७४ हजार ३५२ रुपैया फ्रिज भएको छ ।

सायल गाउँपालिकामा सबैभन्दा कम १.४२ प्रतिशत रकम फ्रिज भएको छ । यस गाउँपालिकाका लागि विनियोजित कुल रकम ३० करोड ९४ लाख नौ हजारमध्ये ४४ लाख तीन हजार एक सय ७४ रुपैयाँ फ्रिज भएको छ ।

दिपायल सिलगढी नगरपालिकाको ११.६४ प्रतिशत रकम फ्रिज भएको छ । कुल ४२ करोड ३५ लाख १४ हजार रुपैयाँ बिनियोजित भएकोमा चार करोड ९३ लाख १७ हजार ७५७ रुपैयाँ फ्रिज भएको छ ।

केआईसिंह गाउँपालिकामा दुई करोड ९३ लाख ६२ हजार ५९६ रुपैयाँ रकम फ्रिज भएको छ । यो रकम गाउँपालिकाका लागि विनियोजित २९ करोड १४ लाख नौ हजार रुपैयाँको १० प्रतिशत हुन आउँछ ।

शिखर नगरपालिकामा करिब ८ प्रतिशत रकम फ्रिज भएको छ । नगरपालिकाका लागि विनियोजित कुल ५१ करोड पाँच लाख ७१ हजार रुपैयाँमध्ये चार करोड पाँच लाख ८० हजार ९३ रुपैयाँ फ्रिज भएको छ ।

जोरायल गाउँपालिकाका लागि विनियोजित कुल रकम ४० करोड ३५ लाख ७६ हजारमध्ये ४ प्रतिशत रकम फ्रिज भएको छ । यस गाउँपालिकामा एक करोड ६५ लाख ३७ हजार २१८ रुपैयाँ फ्रिज भएको हो ।

बडीकेदार गाउँपालिकामा कुल २९ करोड नौ लाख ३९ हजार रुपैयाँ विनियोजित भएको थियो । सो रकममध्ये एक करोड पाँच लाख रुपैयाँ फ्रिज भएको कोलेनिकाका सूचना अधिकारी पन्तले दिएको विवरणमा उल्लेख छ । यो रकम गाउँपालिकाका लागि विनियोजित कुल रकमको ३.६० प्रतिशत हुन आउँछ ।

गत आर्थिक वर्षमा आदर्श गाउँपालिकामा २.७४ प्रतिशत रकम विनियोजित भएको छ । यस गाउँपालिकाका लागि बिनियोजित कुल ३० करोड २३ लाख ३८ हजार रुपैयाँमध्ये ८३ लाख रुपैयाँ फ्रिज भएको छ ।

पूर्वीचौकी गाउँपालिकाका लागि ३३ करोड ६१ लाख ६९ हजार तीन सय रुपैयाँ विनियोजित भएकोमा ६२ लाख १३ हजार १६६ रुपैयाँ खर्च हुन सकेन । यो रकम गाउँपालिकाका लागि विनियोजित कुल बजेटको १.८४ प्रतिशत हुन आउँछ ।

source https://www.onlinekhabar.com/2022/07/1159942