बार्सिलोना अध्यक्ष बार्टोमेउले दिए राजीनामा

१२ कात्तिक, काठमाडौं । स्पेनस क्लब बार्सिलोनाका अध्यक्ष जोसेप मारिया बार्टोमेउले पदबाट राजीनामा दिएका छन् । तर जाँदाजाँदै उनले बार्सिलोनाले युरोपियन सुपर लिगको प्रस्ताव स्वीकार गरेको खुलासा गरेका छन् ।

बार्टोमेउ सन् २०१४ देखि क्लबको अध्यक्ष थिए । सान्ड्रो रोसलले राजीनामा दिएपछि कार्यबाहक अध्यक्ष बनेका उनी २०१५ मा अध्यक्ष चुनिएका थिए ।

दुई कार्यकालभन्दा बढी अध्यक्ष हुन नपाउने प्रावधानका कारण उनले आगामी मार्चमा पद छाड्नुपर्ने थियो । तर पछिल्लो समय बार्सिलोनाका स्टार लिओनल मेस्सीले क्लब छाड्ने इच्छा देखाएपछि अध्यक्ष बार्टोमेउ संकटमा परे।

उनलाई अध्यक्षबाट हटाउन २० हजारभन्दा बढी क्लब सदस्यले हस्ताक्षर गरेका छन् । आगामी नोभम्बर १ र २ मा भोट अफ नो कन्फिडेन्सको मतदान गर्ने प्रस्ताव छ ।

तर बुधबार अध्यक्ष बार्टोमेउ र सिंगो बोर्ड अफ डाइरेक्टर्सले संयुक्तरुपमा राजीनामा दिएका छन् ।

जाँदाजाँदै उनले भविष्यमा क्लबलाई आर्थिक मदत होस् भनेर युरोपियन सुपर लिगमा सहभागी हुने प्रक्रिया सुरु गरेको बताएका छन् । तर यो लिग प्रस्तावित चरणमा छ ।

ला लिगाका अध्यक्ष जेभियर टेबसले भने बार्टोमेउको दाबीमा प्रतिक्रिया दिँदै भनेका छन्, ‘यसले फुटबल उद्योगबारे उनको अज्ञानतालाई पुष्टि गर्छ ।’

source https://www.onlinekhabar.com/2020/10/905903