लिगमा गोलको खडेरी

१५ मंसिर, काठमाडौं । कुनै समय बसन्त थापा, निराजन रायमाझी, हरी खड्का लगायत फुटबल खेलाडीहरुले आफूलाई कुशल स्ट्राइकरको रुपमा स्थापित गरेका थिए । त्यसपछि जुमानु राई, सन्तोष साहुखल, अनिल गुरुङ राष्ट्रिय टिम र क्लबमा गोल गर्ने खेलाडीको रुपमा चिनिए । हिजोआज भने त्यस्तै गोल गर्न सक्ने स्ट्राइकरको कमी नेपाली फुटबलमा देखिँदै आएको छ । अहिले ठ्याक्कै स्ट्राइकरको नाम सोच्दा एकछिन सम्झिनुपर्ने अवस्था छ ।

अहिले राजधानीमा शहीद स्मारक ए डिभिजन लिग चलिरहेको छ । सोमबार दोस्रो चरणको खेल सकियो । जसमा सात खेलमा सात गोल मात्र भयो । औसतमा एक खेल, एक गोल मात्र भयो । पहिलो चरणमा कूल १६ गोल भयो । जसमा ब्रिगेड ब्वाइज र एपीएफबीचको खेलमै पाँच गोल भएको थियो ।

अझ गहिरिएर हेर्ने हो भने दुई खेलमा गोल नै हुन सकेन । यस्तै चार खेलमा एक-एक गोल मात्र भयो । कूल ८ टिमले गोल गर्न सकेनन् । संकटा क्लब र फ्रेण्ड्स क्लबको खेल मात्र यस्तो रह्यो जसमा दुवै टिमले गोल गरे । संकटाले २-१ को पुनरागमन जित निकाल्दा यही खेल सबैभन्दा धेरै गोल भएको खेलको रुपमा अंकित भयो ।

साविक विजेता मच्छिन्द्र र उपविजेता त्रिभुवन आर्मीबीचको प्रतिक्षित खेलमा समेत गोल हुन सकेन । अर्को गोल हुन नसकेको खेल रह्यो बि्रगेड ब्वाइज र एनआरटी बीचको ।
सातदोबाटो युथ क्लबले थ्री स्टारलाई, नेपाल पुलिसले जावलाखेल युथलाई, मनाङ मर्स्याङ्दीले हिमालयन शेर्पालाई र च्यासल युथले एपीएफलाई समान १-० को स्कोरमा हराए ।

दोस्रो चरणमा जित्ने पाँच टिमसहित हार्ने एक टिमले मात्र गोल गर्न सक्यो । गोल गर्नेमा मनाङका विदेशी खेलाडी ओलावाले आफिज र संकटामा फोडे फोफाना मात्र स्ट्राइकर रहे । अन्य गोल मिडफिल्डरले गरेका थिए ।

यसअघि २०७६ मा पछिल्लो पटक लिग हुँदा नाम चलेका खेलाडी जम्मा गरेर मच्छिन्द्रले लिग जितेको थियो । केही खेलाडी थप्दै उपाधि रक्षा गर्ने लक्ष्य बनाएको मच्छिन्द्रले यस सिजन राष्ट्रिय टिमका मनिष डाँगी र सुनिल बललाई समेत भित्रायो । चोटबाट फर्केका विमल घर्तीमगरले पनि मच्छिन्द्रबाटै खेलेका छन् ।

मच्छिन्द्रका प्रशिक्षक प्रवेश कटुवालले लिग सुरु हुनुअघि नै उपाधि रक्षाका लागि जोड दिँदै फरवार्ड अनुबन्ध गरेको बताएका थिए ।

तर करिब आधा दर्जन फरवार्ड रहेको मच्छिन्द्रले दोस्रो खेलमै गोल गर्न सकेन । पहिलो खेलमा एनआरटीलाई २-१ ले पराजित गर्दा दुई गोल गरेका सुनिल बलले दोस्रो खेलमा गोल गर्न सकेनन् ।

मच्छिन्द्रका सेन्ट्रल फरवार्ड रेजिन सुब्बा चोटका कारण एक महिना बाहिर रहने छन् । यसले गर्दा मच्छिन्द्रसँग भएका फरवार्डमा सेन्ट्रल पोजिसनमा खेल्ने खेलाडी छैनन् ।

उनै प्रवेश कटुवालले आर्मीविरुद्ध बराबरी खेलेपछि टिममा फरवार्डकै कमी रहेको बताए । ‘विशुद्ध स्ट्राइकर नभएकाले गोल नभएको र सेन्टर फरवार्डको खाँचो रहेको छ,’ कटुवाल भन्छन् । मच्छिन्द्र जस्तो फरवार्डको भिड रहेको टिमलाई समेत गोल गर्न चुनौती भएपछि गोल गर्ने खेलाडीकै अभाव भएको भन्न सकिन्छ । कटुवालले अभिषेक रिजालले पनि तालिम गरेअनुसार सोचेजस्तो खेल्न नसकेको बताए ।

उता आर्मीका प्रशिक्षक नवीन न्यौपानेले पनि स्कोरिङमै समस्या भएको बताए । राष्ट्रिय टिमका फरवार्ड समेत रहेका नवयुग श्रेष्ठ पि्र-सिजन खेलमा घाइते भएपछि आर्मीलाई उनको अभाव प्रष्ट देखिएको छ । आर्मीका कप्तान भरत खवास र जर्ज पि्रन्स कार्कीबाट गोलको अपेक्षा गरे पनि त्यो पूरा हुन सकेको छैन । पहिलो खेलमा पुलिससँग १-१ को बराबरी खेल्दा विवेक बस्नेतले बेन्चबाट गएर बराबरी गोल फर्काएका थिए ।

आर्मीका प्रशिक्षक न्यौपानेले खेल स्कोरिङमा फोकस गरेपनि त्यसो हुन नसकेको र उपाधि होडमा रहने हो भने गोल गर्नैपर्ने बताए ।

सर्वाधिक ८ पटकको विजेता मनाङले लगातार दुई खेल जित्दा जम्मा २ गोल मात्र गरेको छ । पहिलो खेलमा जावलाखेललाई १-० ले पराजित गर्दा डिफेण्डर दिनेश राजवंशीले गोल गरेका थिए । कप्तान तथा राष्ट्रिय टिमका सदस्य अन्जन विष्टले पनि दुई खेलमा गोल गर्न सकेका छैनन् ।

उपाधिको अर्को दाबेदार मानिएको थ्री स्टार क्लबले पनि दोस्रो चरणमा नवप्रवेशी सातदोबाटो विरुद्ध गोल गर्न सकेन । पहिलो खेलमा डिफेण्डरको तीन गोल मद्दतमा च्यासललाई ३-० ले पराजित गरेको थ्री स्टार सातदोबाटोसँग १-० ले पराजित भयो । थ्री स्टारका प्रशिक्षक उर्जन श्रेष्ठले पनि खेलपछि स्ट्राइकरको कमी भएको बताएका थिए ।

उनले स्कोरिङमा समस्या रहेको बताएका थिए । थ्री स्टारमा राष्ट्रिय टिमबाट खेलिसकेका संजोग राई र यू-२३ टिमका फरवार्ड रितिक कुमार खड्काले फरवार्डको भूमिका खेलिरहेका छन् । तर गोल गर्न सकेका छैनन् ।

पहिलो पटक ए डिभिजन लिग खेलिरहेको सातदोबाटोले पनि दुई खेलमा गोल गर्ने राम्रो अवसर बनाए पनि जम्मा एक गोल मात्र गरेको छ । ए डिभिजनका अनुभवी प्रशिक्षक मेघराज केसीले यस पटक सातदोबाटोको टिम हेरिरहेका छन् । उनले पनि अवसर पाएर स्कोर हुन नसकेको बताए ।

यस्तै फ्रेण्ड्स, जावलाखेल, एपीएफको पनि स्कोरिङमै समस्या देखिएको छ । जावलाखेलले त झन् दुवै खेलमा हार व्यहोर्दा एक गोल समेत गर्न सकेको छैन । जावलाखेलका प्रशिक्षक किशोर केसीले सबैखाले रणनीति प्रयोग गर्दा पनि गोल हुन नसकेको बताएका थिए ।

लिगको खेलपछि हरेकजस्तो क्लबका प्रशिक्षक स्कोरिङमा समस्या देखिएको र स्ट्राइकरकै कमी भएको बताएका छन् । फुटबलमा जब गोल हुन्छ, खेलाडीसँगै दर्शक पनि उत्साहित हुन्छन् । तर जब गोल हुँदैन त्यस खेलको मज्जा पनि हुँदैन र गोल हेर्न पुगेका दर्शक पनि निराश हुन्छन् ।

source https://www.onlinekhabar.com/2021/12/1046596