चार हारपछि लिभरपुलको पहिलो जित

१७ फागुन, काठमाडौं । साविक विजेता लिभरपुलले प्रिमियर लिगमा लगातार चार हारको श्रृखंलालाई अन्त्य गर्दै शेफिल्ड युनाइटेड विरुद्ध जित हात पारेको छ । आइतबार राति भएको खेलमा लिभरपुलले शेफिल्डलाई २-० ले पराजित गरेको हो ।

लिभरपुलको जितमा युवा खेलाडी कर्टिन्स जोन्सले गोल गरे । यस्तै शेफिल्डका केन ब्रायन्सले एक आत्मघाती गोल गरे ।

दुवै गोल दोस्रो हाफमा भएको थियो । ४८औं मिनेटमा २० वर्षीय जोन्सले गोल गर्दै अग्रता दिलाएका थिए । जोन्सले प्रिमियर लिगमा गरेको यो दोस्रो गोल हो । ब्रायनले ६४औं मिनेटमा आत्मघाती गोल उपहार दिएका थिए ।

जितपछि २६ खेलबाट ४३ अंक जोड्दै लिभरपुल छैटौं स्थानमा छ र चौथो स्थानको वेष्टहमसंग अंकदुरी २ मा झारेको छ ।

जनवरी अन्त्यमा वेष्टहम युनाइटेडलाई ३-१ ले पराजित गरेयता लिभरपुलले पहिलो जित हात पारेको हो ।

source https://www.onlinekhabar.com/2021/03/934452