अंकितको ‘सङ अफ दि क्लाउड’ले इटलीमा जित्यो पुरस्कार

अंकित पौडेलको निर्देशनमा तयार भएको ‘सङ अफ दि क्लाउड’ नामक चलचित्रले इटलीमा आयोजित ‘एसोलो आर्ट फिल्म फेस्टिभल’मा पुरस्कार जितेको छ । मृत्युपछिको जीवनलाई कल्पना गरि तयार पारिएको यो चलचित्रले आर्ट फिल्म विधातर्फ पुरस्कार जितेको हो । विजेता बनेको चलचित्रलाई ५ सय यूरो पुरस्कार प्रदान गरिएको छ ।

अंकित निर्देशित चलचित्र जनवरीमा सनडान्स फिल्म फेस्टिभलमा प्रिमियर भएको थियो । त्यसयता यो चलचित्र अटलान्टा फिल्म फेस्टिभल, पामस्प्रिङ इन्टरनेसनल सर्ट फेस्ट, दि नर्वेजियन सर्ट फिल्म फेस्टिभल, डोकु फेस्ट आदि फिल्म महोत्सवमा प्रदर्शन भइसकेको छ । फिल्मले वल्र्ड फेस्ट हस्टन इन्टरनेसनल फिल्म फेस्टिभलमा ब्रन्ज रेमी अवार्ड पनि जितिसकेको छ ।

अंकितले नेपालको अस्कर कलेजबाट चलचित्र निर्माणमा स्नातक गरेका थिए । छायांकारको रुपमा २० भन्दा बढी प्रोजेक्टमा काम गरेका अंकितको ‘सङ अफ दि क्लाउड’ डेब्यु फिल्म हो ।

source https://www.onlinekhabar.com/2020/07/884916